Është inauguruar parku dhe këndi i lojërave në Davidoc të Shtimes.
Në këtë inaugurim ka marrë pjesë kryeministri i Kosovës, Albin Kurti, projekt i cili është bashkëfinancim i Qeverisë, përkatësisht Ministrisë së Administrimit të Pushtetit Lokal dhe Komunës së Shtimes, në vlerë prej 144 mijë euro me një sipërfaqe prej 1 hektari.
Kurti ka thënë se në fund të vitit të kaluar bashkë me kryetarin Aliu, kanë inauguruar edhe parkun tjetër në fshatin Gjyrkoc, i cili tashmë është bërë pjesë e komunitetit të fshatit dhe pikëtakim për fëmijët.
“Urojmë që edhe ky park të kthehet në një vend ku shumë fëmijë dhe grupmosha të ndryshme do të kalojnë kohën e lirë dhe do të përjetojnë momente së bashku. Është pikërisht ky roli i Komunës edhe i Shtetit, që të krijojë hapësira publike për qytetarët e saj, sepse janë këto hapësira publike ato të cilat e inkurajojnë që të kemi një lidhje të fortë të individit me vendin e tij, por edhe me qytetarët e tjerë të cilët i ndajnë këto hapësira”, tha Kurti.
Tutje, nga komunikata e Qeverisë është bërë e ditur se kryeministri ka thënë që shumë shpejt do të ketë inaugurime të reje në këtë pjesë.
“Sepse pritet të fillojnë dy projekte të rëndësishme, Rehabilitimi i Rrugës Rajonale Transiti me 1.7 milion, si dhe rehabilitimi i Rrugës rajonale Shtime – Lipjan, me vlerë 1.5 milion euro. Që do të sigurojnë lëvizjen e lirë të njerëzve dhe të mallrave në këtë komunë”, thuhet në komunikatë./teve1.info/
