Mbi një milionë euro në ditë është shuma që KEDS dhe KESCO thonë se po importojnë energji elektrike aktualisht.
Kjo u bë e ditur nga Kompania Kosovare e Distribuimit të Energjisë ku thanë se kjo po ndodhë për shkak të kërkesës më të madhe sesa të prodhimit, teksa fajtor lënë Korporatën Energjetike të Kosovës.
“Prodhimi aktual është më i ulët se bilanci elektroenergjetik që na ishte paraqitur. Lidhur me këtë, ne kemi reaguar, duke kërkuar nga prodhuesi më i madh vendor, KEK-u, që t’i përmbahet planit, sepse çdo devijim nga plani, në këtë rast mbi 120 megavat në orë minus, paraqet barrë të rëndë për dy kompanitë dhe e vë në vështirësi komplet sistemin elektroenergjetik”, thuhet në kumtesë.
E për këtë, ka reaguar KEK-u ku përmes një komunikateje të enjten, tha se nuk janë përgjegjës për furnizim dhe distribuim por vetëm prodhim.
“Lidhur me këtë çështje, ju bëjmë me dije se KEK sipas marrëveshjes për furnizim me shumicë krijon obligim kontraktual, përkatësisht të nominojë (deklarojë) VETËM njësitë gjeneruese që ka në dispozicion në baza ditore dhe atë një ditë para. Tutje, për hire të korrektësisë dhe qartësimit të opinionit, KEK rithekson se bazuar në kushtet e licencave të gjenerimit, obligimi i KEK-ut mbetet vetëm prodhimi i energjisë elektrike, ndërsa obligimi i KESCO është FURNIZIMI i konsumatorëve me energji elektrike. Andaj, konsiderojmë se adresimi i KESCO dhe KEDS përmes mjeteve të informimit përveç se nuk ka pasqyruar gjendjen reale, ka shkaktuar edhe huti në opinion”, thuhet në komunikatë.
Tëvë1 ka kërkuar sqarime nga këto dy kompani se a janë duke u evituar këto pengesa në mënyrë që mos të ketë reduktime të rrymës te qytetarët, por që gjatë ditës asnjë nga këto nuk kanë kthyer përgjigje.
E njohësi i fushës së energjisë, tregon disa hapa për evitimin e këtyre problemeve me furnizim me energji elektrike.
Televizioni ka tentuar po ashtu të marrë përgjigje edhe nga Qeveria e Kosovës se a do të përballen qytetarët me mungesë të energjisë elektrike gjatë këtij sezoni, por nga Ministria e Ekonomisë nuk kanë qenë të qasshëm.
