Pas përfshirjes disa herë nga zjarri të Institutit të Mjekësisë Ligjore, Ministria e Drejtësisë ka ndarë mbi 800 mijë euro për renovim të këtij objekti. Se çka është më e nevojshme të ndryshohet në të, e thonë vetë përfaqësuesit e IML-së.
Disa herë u përfshi nga zjarri.
Si pasojë, në Institutin e Mjekësisë Ligjore u dëmtuan zyrat dhe dosjet në to.
Së fundmi, shkaku i zjarrit dyshohet se ka qenë një defekt elektrik në njërën nga pajisjet në korridor.
Por dëmi material sipas IML-së ka qenë i vogël.
E nga ky Institut theksojnë arsyet se cilat hapësira kanë nevojë për ndryshim.
“MD gjithmonë na ka furnizu mjaftueshëm me material shpenzues, por hapësirat që janë për ekzaminim janë ndërtuar kohë më parë dhe nuk është menduar shumë për grup-moshën, natyrën e viktimave që vijnë tek ne”, tha Bergita Curri nga IML-ja.
Prandaj, është kërkuar ridizajnimi i kësaj hapësire.
“Ne tentojmë që të funksionojmë në maksimum në të mirën e viktimave me këto kushte që i kemi, por ne e kemi planifikuar në projektin e renovimit që do të ndodhë tani pas nënshkrimit të projektit të IML-së, e kemi menduar edhe ridizajnimin komplet të hapësirës së ekzaminimeve”, tha Curri.
E për rinovimin e këtij Instituti njoftoi edhe Ministria e Drejtësisë në fund të shtatorit.
“Nënshkrova kontratën për renovimin e objektit të Institutit të Mjekësisë Ligjore, me një vlerë prej 814,229.72 euro. Ky investim po bëhet për herë të parë dhe do të mundësojë transformimin e plotë të hapësirës së brendshme, duke përfshirë renovimin e laboratorëve, sallave të autopsisë, kulmit dhe zyrave të punës”, thuhet nga MD-ja.
Në Institutin e Mjekësisë Ligjore kryhen të gjitha ekzaminimet mjekoligjore nga specialistë (ekspertë) të certifikuar mjekoligjor. /teve1.info/
