Analisti, Dorajet Imeri, thotë se Serbia është përkrahur në takimin e djeshëm në Bruksel të mbajtur mes kryeministrit të Kosovës, Albin Kurti dhe presidentit të Serbisë, Aleksandër Vuçiq.
Imeri, thotë se veprimet e mëvonshme të lidhura me mbajtjen e zgjedhjeve, si dhe marrja e detyrave të kryetarëve janë parë nga Bashkimi Evropian si përpjekje për t’iu shmangur zbatimit të marrëveshjes.
“Në Ohër janë dakorduar palët që do të respektohet të gjitha marrëveshjet e arritura paraprakisht dhe marrëveshja kyçe ose më e rëndësishme që ka mbetur të zbatohet është marrëveshja sa i takon Asociacionit me Shumicë Serbe, përkatësisht fillimit të draftimit të statusit të saj dhe prandaj unë konsideroj që veprimet e mëvonshme lidhur me mbajtjen e zgjedhjeve në veriun e Kosovës, pastaj marrja e detyrës së kryetarëve nëpër komuna dhe të gjitha këto pastaj janë parë nga Bashkimi Evropian si një përpjekje për ta shmangur zbatimin e obligimeve që Kosova vetëm se i rikonfirmojë në Ohër”, tha analisti në emisionin “Ditari” në Tëvë1.
Sipas këtyre veprimeve, Imeri parasheh që janë vendosur edhe masat e BE-së ndaj Kosovës.
“Prandaj, edhe sanksionet kanë qenë pikërisht për të, prandaj dua të them se kjo është një proces i natyrshëm çfarë ka ndodhur ngase Kosova është deklaruar e gatshme për të zbatuar marrëveshjen”, deklaroi Imeri.
Tutje, sa i përket takimit të djeshëm në Bruksel, Imeri thekson se vetë procesi i dialogimit ka qenë jo i barabartë.
“Fatkeqësisht nuk ka asnjë dilemë që Serbia është përkrahur, së paku kjo është perspektiva ime gjatë gjithë procesit. Madje, vetë procesi ka qenë jo i barabartë në kuptimin e trajtimit të palëve si të tilla”, shtoi ai.
Dje, në Bruksel është mbajtur takimi i nivelit të lartë mes Kurti dhe Vuçiqit. Shefi i politikës së jashtme të BE-së, Josep Borrell, i cili bashkë me të dërguarin e BE-së për dialog, Mirosllav Lajçak, ndërmjetësuan takimin, tha se Kurti ka këmbëngulur që të formalizohet, fillimisht, njohja de facto e Kosovës nga Serbia. Kurti dhe Vuçiq, në konferenca të ndara për media, akuzuan njëri-tjetrin për mungesën e rezultateve nga takimi./teve1.info/
