Takimi i Komisionit të Përbashkët për Personat e Zhdukur që ishte planifikuar të mbahej në Bruksel nuk është realizuar, pasi që Serbia refuzoi të marrë pjesë në këtë takim.
Profesori i Shkencave Politike, Dorajet Imeri në lidhje me këtë refuzim ka thënë se ishte i pritshëm dhe se Serbia vazhdimisht do të jetë e njëjta, derisa BE-ja do të ketë këtë qasje që ka sot ndaj saj.
“Asgjë nuk është e papritshme. Serbia vazhdimisht e ka pasur qëndrimin e njëjtë që fillimisht t’i arrijë marrëveshjet dhe më pas të mos i zbatojë ato, pastaj t’i rinegociojë dhe në këtë mënyrë të na mbajë peng pambarimisht për aq kohë që BE-ja e ka këtë qasje… “, ka thënë ai.
I pyetur për aksionin e Policisë për mbylljen e komunave paralele në 10 qytete të Kosovës, Imeri tha se Kosova ka kryer detyrën e saj kushtetuese.
“Kosova dhe Serbia janë në negociata nga viti 2011 dhe këso veprime më herët nuk ka pasur në veri dhe fakti që po ndodhin këso tejzgjatje të gatishmërisë për tu dakorduar për një marrëveshje finale në mes të palëve tregon se Serbia nuk është e interesuar për më i mbyllë bisedimet me Kosovën. Çfarë kanë pritur që Kosova të mos kryejë funksionet e veta shtetërore dhe institucionale në atë pjesë?..Kosova ka kryer detyrën e saj kushtetuese në veriun e vendit”, ka deklaruar ai në emisionin “Ditari” në Tëvë1.
