I ftuar në emisionin “Këndi i Debatit” në Tëvë1, Imeri tha se Kosova do të përballet me veprime të tilla edhe në të ardhmen, “jo me atentate, por me lajme të rreme”.
“Kosova me gjasë do të përballet pastaj edhe me veprime të tilla të tjera edhe në të ardhmen. Nuk them që mund të ketë atentate, por them se mund të ketë kësi lajme të rreme, ju kujtohet çështja e paralajmërimit për bombë në Aeroportin e Prishtinës në kohën kur gjithçka në Kosovë vlonte… ka mendime nga jashtë përmes rrjeteve të caktuara sociale, gazeta e këto, po flasim për një përpjekje të organizuar, sinkronizuar që deminohet siguria e Kosovës dhe përmes këtij minimi të sigurisë së Kosovës të mund të ketë pastaj përhapje edhe më të gjerë dhe në këtë mënyrë fillimisht negociatat Kosovë – Serbi të dalin në plan të dytë…”, tha ai.
Tutje Imeri tha se institucionet e Kosovës duhet të tregohen syhapur në këtë kohë.
“Skena jonë politike duhet të ruaj qetësinë, liderët politikë të Kosovës janë të veshëm dhe të nevojshëm për proceset tona politike për të cilat kemi kaluar dhe e kam një bindje të plotë që pavarësisht divergjencave politike që ka skena jonë politike aktuale, një diskutim i tillë nuk i përket as nuk është përmend dhe as që do të duhej të përmendej në skenën tonë politike”, shtoi Imeri.
Të mërkurën në mesditë, shërbimet intelegjente ndërkombëtare dhanë alarm për një plan-atentat ndaj disa prej deputetëve të opozitës. Lumir Abdixhiku, Memli Krasniqi, Ganimete Musliu, Avdullah Hoti, Arben Gashi dhe Armend Zemaj, janë gjashtë zyrtarët ndaj të cilëve dyshohet se planifikohej një gjë e tillë./Teve1.info/
