Dorajet Imeri, në emisionin “Info Nata” në Tëvë1, ka folur për mundësinë e një bashkëpunimi mes partive politike për zgjedhjen e presidentit, në mënyrë që vendi të mos shkojë në zgjedhje të reja.
Sipas tij, një marrëveshje e mundshme mund të arrihet mes Lëvizjes Vetëvendosje dhe Lidhjes Demokratike të Kosovës, por jo edhe me Aleancën për Ardhmërinë e Kosovës.
“Nuk e shoh të mundur një bashkëpunim me AAK-në, sepse marrëveshja synohet me LDK-në. Problemi është se Kurti nuk e ndan pushtetin e vet me askënd. Kjo është ajo që po thuhet”, ka deklaruar Imeri.
Ai ka rikujtuar edhe situata të mëhershme politike, duke përmendur votimin për presidenten në të kaluarën dhe lëvizjet e deputetëve që mundësuan krijimin e kuorumit në Kuvend.
Sipas Imerit, Lëvizja Vetëvendosje, ndonëse kishte fituar rreth 50 për qind të votave, do të rrezikonte mbështetjen po të mos zgjidhej Vjosa Osmani presidente në atë kohë.
Duke folur për raportin aktual mes Osmanit dhe Kurtit, Imeri u shpreh se nëse Osmani nuk zgjidhet sërish presidente, ajo nuk do ta lidhë më të ardhmen e saj politike me Kurtin.
“Unë mendoj që nga momenti që Vjosa Osmani nuk do të zgjidhet presidente, ajo nuk do ta lidhë më partinë e saj Guxo me zotin Kurti. Do të jenë të ndarë. Por në asnjë rrethanë nuk e shoh rikthimin e saj në LDK, për shkak të afërsisë që është krijuar mes Kurtit dhe partisë Guxo”, ka thënë Imeri.
Në fund, ai shtoi se sipas tij, Osmani e ka ditur që në fillim se nuk do t’i kishte votat e mjaftueshme për t’u zgjedhur sërish presidente.
“Vjosa Osmani e ka ditur që nga fillimi se nuk do t’i ketë votat për t’u zgjedhur përsëri presidente”, përfundoi Imeri.
