Politologu, Dorajet Imeri duke folur zgjedhjen e presidentit të vendit ka thënë se nëse partitë opozitare e propozojnë Ramush Haradinajn do të bënin veprimin më të zgjuar politik.
Ai ka thënë se me këtë opozita do të shmangte zgjedhjet e reja, që sipas tij, shkuarja në zgjedhje nuk do të ishte në favor të tyre.
“Ka ndoshta një përpjekjeje të partive opozitare që të mbledhin nënshkrimet e nevojshme për z,Haradinaj që të jetë kandidati i opozitës për president. Për mua ky do të ishte veprimi më i zgjuar i opozitës. E para nuk e qon vendin në zgjedhje, e dyta i hynë garës, e treta tregon se mund të bashkëpunojnë për tema të rëndësishme dhe e katërta i jep vendit stabilitet institucional. Për mua, ky do të ishte veprimi më i zgjuar politik i opozitës që ta propozojë Ramush Haradinajn”, ka thënë Imeri në emisionin “InfoNata” në Tëvë1.
Ai ka thënë se opozita mund ta dërgojë vendin në zgjedhje, por sipas tij presidenti është i gjithë Republikës.
“Kjo është shumë e rëndësishme, sepse partitë e opozitës vërtet mund ta çojnë vendin në zgjedhje, por mos ta harrojmë se presidenti i vendit nuk është presidenti (vetëm) i shumicës. Ani pse ai merr votat nga shumica, presidenti i vendit është president i Republikës.Pra, dëmi që mund të bëjnë, ose veprimi që mund të ndërmarrin partitë opozitare, në rastin më të mirë (për to), është dëm për partinë fituese të zgjedhjeve, por edhe për vendin.
Kjo është e interpretueshme, sepse ata (opozita) thonë: ne mund të supozojmë se marrim një rezultat më të mirë pas një kohe. Kjo është një lojë me shumë të panjohura; ndoshta as nuk mund të marrin më shumë vota. Pra, qëllimi është të merren votat për partitë politike dhe jo interesi dhe stabiliteti institucional për të cilin po flasim. Prandaj, partitë politike opozitare nuk kanë një pozicion të favorshëm që të kenë si opsion shkuarjen në zgjedhje, dhe për këtë arsye thashë se kandidimi i z. Haradinaj është një veprim shumë i mençur dhe i duhur për të shmangur zgjedhjet, për ta pranuar garën dhe për ta ruajtur votën e tyre” , ka thënë ai.
Imeri ka komentuar edhe aktgjykimin e Gjykatës Kushtetuese për nënkryetarin e Kuvendit nga komuniteti serb, që sipas Kushtetueses i takon vetëm partisë më të madhe serbe e që në këtë rast është Lista Serbe.
Ai ka thënë se me këtë vendim është prekur vullneti i lirë i deputetëve për të votuar.
Imeri ka vlerësuar se nuk pret krizë në konstituimin e Kuvendit, duke thënë se votimi i nënkryetarëve në pako është një mundësi e zbatimit të aktgjykimit.
“Konstituimi i Kuvendi nuk parashoh që mund të jetë shumë pengesë, ndoshta mund të kalohet me votim në pako të nënkryetarëve të Kuvendit”, ka thënë ai.
