Analisti, Dorajet Imeri e fajëson Bashkimin Evropian për “dështimin” e dialogut Kosovë – Serbi.
Imeri thotë se në procesin e dialogut ka pasur përpjekje edhe për t’iu shmangur ndikimit rus, pasi që thotë se Rusia ka qenë e përfshirë brenda procesit.
“Fakti që është çështje evropiane, ka qenë një përpjekje për të shmangur ndikimin e madh rus që është në proces, sepse ju e dini se Rusia ka qenë e përfshirë në proces, qoftë në kohën kur është realizuar Rezoluta 12 44, qoftë më vonë kur kanë vijuar bisedimet, qoftë kur janë vendosur standardet e statusit dhe më vonë përmes përfaqësuesit të saj në treshen e famshme të procesit negociues në Procesin e Vjenës”, tha ai në emisionin “Ditari” në Tëvë1.
Sipas tij, BE-ja ka dështuar në proces, pasi thotë se nuk i ka përdorur mekanizmat detyrues e stimulues që i ka.
“Mendoj se ka qenë një projekt që të shmang ndikimin gjeo-strategjik rus, t’i përafroj palët në procesin e saj integrues, por Bashkimi Evropian dështoi në këtë proces, prandaj BE-ja është fajtore për këtë proces, sepse nuk po përdor mekanizmat e saj detyrues e stimulues që ka, të cilët janë të mjaftueshëm për t’i afruar palët, sepse në këtë mënyrë do ta përmbyllte procesin”, tha analisti.
Kosova dhe Serbia nisën dialogun për normalizimin e marrëdhënieve në vitin 2011 dhe dy vjet më vonë, nënshkruan marrëveshjen e parë si pjesë e dialogut në nivel politik. Pasi që s’kishte përparim vitin e kaluar, BE-ja propozoi një marrëveshje për rrugën drejt normalizimit të marrëdhënieve, të cilën palët e pranuan, por nuk e zbatuan./teve1.info/
