Për më shumë se një çerek shekulli, imami Kukaj ka ftuar myslimanët, hebrenjtë, të krishterët dhe besimtarët e feve të tjera që ta ndajnë së bashku bukën në darkat e Iftarit Ndërfetar.
Në çmimin që i është ndarë thuhet se Tahir Kukaj është një anëtar kyç i Udhëheqjes Ndërfetare të Staten Island që mbron viktimat e urrejtjeve, pavarësisht nga raca, feja apo seksualiteti.
Për shkak të kontributit, Kukaj tri herë radhazi është renditur në listën e 100 personaliteteve më me ndikim në Staten Island të Nju Jorkut, listë kjo e përgatitur nga e përjavshmja politike “City & State” (Shteti dhe Qyteti).
Kukaj është nga Tërsteniku i Drenasit dhe është imami i parë që është ftuar për ta hapur seancën e Asamblesë së Shtetit të Nju Jorkut me lutje fetare dhe me fjalim rreth rëndësisë së Muajit të Ramazanit.
Kongresisti amerikan, Max Rose, e pati zgjedhur pikërisht atë, për të ofruar lutjen me rastin e inaugurimit të tij.
Para disa vjetësh, Kukaj ishte ftuar edhe nga kryetari i Bashkisë së Nju Jorkut, Bill de Blasio, për ta bekuar linjën e re të tragetit që transporton njujorkezët çdo ditë nga Beach Channel Drive dhe Beach 108th Street, në Rockaway Park./teve1.info/
