Instituti Kombëtar i Shëndetësisë Publike, ka njoftuar se uji nga liqeni i Badocit vazhdon të mos jetë i pijshëm për shkak të vlerave të larta të manganit.
Përmes një postimi në Facebook, IKSHPK-ja ka apeluar tek qytetarët që të vazhdojnë të ndjekin oraret e furnizimit me ujë të pijshëm nga autobotet.
“Analizat laboratorike të realizuara në ditët e fundit rezultojnë me vlera të manganit të cilat tejkalojnë kufirin e lejuar të përqendrimit të manganit prej 0.05 mg/l sipas Udhëzimit Administrativ Nr. 10/2021 për” Cilësinë e Ujit për Konsum nga Njeriu”, dhe gjithashtu tejkalojnë standardin shëndetësor prej 0.3-0.4 mg/l mbi të cilin konsiderohet se mund të ketë ndikim në shëndet.
Me qëllim të mbrojtjes së shëndetit të popullatës, IKSHPK apelon tek qytetarët që furnizohen nga Fabrika e Ujit në Liqenin e Badocit që të mos e përdorin ujin për pije deri në njoftimin e radhës. Për zonat me emrat e rrugëve dhe oraret e furnizimit me ujë të pijshëm nga autobotet, ju lutem përcjellni komunikatat nga KRU ‘Prishtina”, thuhet në njoftim.
