Instituti Kombëtar i Shëndetësisë Publike të Kosovës (IKShPK), ka bërë të ditur se uji i Liqenit të Badocit është i gatshëm për pije, pasi që kanë rënë vlerat e manganit, që ishin të pranishme në ujë tash e disa javë.
IKShPK thotë se vlerat e manganit në ujin e liqenit dhe në rrjetin shpërndarës rezultojnë brenda standardeve të parapara për konsum nga njeriu.
“Për t’u shpallur uji higjienik dhe i sigurt për pije në zonën e furnizimit nga fabrika e Badovcit, në laboratorët e IKSHPK-së, Laboratori i parametrave bazik ku testohet Mangani si parametër indikues dhe Laboratori analitik-ICPMS ku testohet mangani si metal i rëndë, sipas procedurave standarde janë kryer tri matje të njëpasnjëshme në tri ditët e fundit: Më datën 17 nëntor: 0.025-0.05 mg/litër, më datën 18 nëntor: 0.010-0.031 mg/ litër, më datën 19 nëntor: 0.017-0.037 mg/ litër”, thuhet në njoftim.
Tutje, është bërë e ditur se bazuar në rezultatet laboratorike, uji në zonat e furnizuara nga Liqeni i Badovcit gjegjësisht – Fabrika në Badovc i plotëson kriteret të parapara për konsum.
“Bazuar në rezultatet laboratorike, uji në zonat e furrnizuara nga Liqeni i Badovcit gjegjësisht – Fabrika në Badovc i plotëson kriteret të parapara me Udhëzimin Administrativ nr. 10/2021 “Cilësia e Ujit për konsum nga njeriu”(vlerat referente të Manganit 50 µg/L (0.05 mg/L). Nga sot vazhdon monitorimi i rregullt si aktivitet themelor i Qendrës së ujit brenda IKSHPK-së”./teve1.info/
