Armët e konfiskuar nga Policia e Kosovës në Banjskë të Zveçanit mund të përdoren nga institucionet e Kosovës pas të përfundojë ekzaminimi. Nga Instituti i Kosovës për drejtësi një vendim të tillë për përdorim të armëve lëshohet me vendim nga Gjykata. Por ekziston mundësia edhe e asgjësimit të tyre.
Snajperë, granata, e minahedhës, janë disa nga armët e konfiskuar nga Policia e Kosovës në Banjskë të Zveçanit. E arsenali i armëve të prezantuar nga Policia e Kosovës, përbëhej edhe nga autoblinda e vetura të cilat grupi terrorist serb i kishte sjellë në Kosovë.
Këto armë, fillimisht do të përdoren si prova për procedurat gjyqësoret që po mbahen ndaj të akuzuarve për sulmin terrorist të 24 shtatorit.
“Armët në këtë rast do të ruhen deri në fazën përfundimtare, në mënyrë që të përfundojë çdo ekzaminim që mund të ndërlidhjet me zbardhen e çështjes me procedurën penale”, ka thënë Gëzim Shala nga IKD.
E nga Policia e Kosovës kanë bërë të ditur se pas përfundimit të procesit gjyqësor ndaj të akuzuarve, organet e drejtësisë do të vendosin për armët e konfiskuara.
“Armët e konfiskuar janë dëshmi për organet e drejtësisë. Varësisht se çka vendosin ato pas përfundimit të procesit gjyqësor ashtu edhe do të veprohet”, është shprehur zëdhënësi i PKs-ë, Baki Kelani.
Por sipas Instituti Kosovar për drejtësi, këto armë mund edhe të përdorën nga institucionet e sigurisë në vend.
“Kemi një praktike nga ana e institucioneve të Kosovës, që armët që kanë përfunduar procesin e ekzaminimit të mos shkatërrohen. Të bëhet kërkesë dhe të lëshohet vendim nga ana e Gjykatës për përdorim nga ana e institucioneve publike nëse të njëjta janë adekuate për përdorim, kjo formë përdoret edhe nga shtete e tjera”, është shprehur Shala nga IKD.
Por ndryshe mendon, eksperti i sigurisë, Bedri Elezi.
Sipas tij, këto armë në bazë të procedurave duhet të asgjësohen.
“Kemi një procedurë të rregullimit konfiskimit të armëve dhe të asgjësimit të tyre, në kushte dhe rrethana të tilla, armët duhet të asgjësohen, por unë rekomandojë që armët e njëjta të përdoren nga institucionet e sigurisë, por si procedurë Policia e Kosovës e ka asgjësimin e tyre”, tha eksperti i sigurisë, Bedri Elezi.
Vlera e këtyre armëve të konfiskuar sipas ministrit të punëve të Brendshme, Xhelal Sveçla kap vlerën e 5 milionë eurove.
