Instituti Hidrometeorologjik i Kosovës ka lëshuar një njoftim paralajmërues me nivel të verdhë, duke sinjalizuar reshje të mëdha shiu dhe mundësi të shtuar për vërshime në disa zona të Kosovës.
Sipas institutit, përkeqësimi i kushteve atmosferike pritet të nisë nga mbrëmja e së shtunës.
Në njoftim theksohet gjendja e ndjeshme hidrometeorologjike e ditëve të fundit, me reshje të vazhdueshme që në disa rajone kanë shkaktuar vërshime.
Megjithëse aktualisht niveli i lumenjve ka rënë, reshjet e reja të parashikuara pritet të ndikojnë në rritjen e prurjeve, sidomos në anën lindore të vendit, përfshirë Pellgun e Moravës së Binçës.
“Duke pasur parasysh, situatën e përgjithshme të pa qëndrueshme hidrometeorologjike gjatë këtyre ditëve, e cila përfshin reshje, duke shkaktuar edhe vërshime në disa zona të vendit. Aktualisht lumenjtë në tërë vendin kanë pësuar rënie, por reshjet e shiut të cilat parashikohen të bien gjatë orëve në vijim, sidomos në pjesën lindore (Pellgu e Moravës së Binçës), do të ndikojnë që të rriten përsëri prurjet e ujit nga pjesët e larta malore dhe rrjedhimisht edhe Lumin Morava e Binçës me degën kryesore Kriva Reka, të cilat mund të shkaktojnë vërshime”, thuhet në njoftim.
Situatë e ngjashme pritet të shfaqet edhe në rajone të tjera, veçanërisht në veri-lindje (Pellgu i Llapit), në pjesën qendrore (Sitnica) dhe në jug (Pellgu i Lepencit).
“Fenomenet e motit që janë parashikuar nuk janë të pazakonta, por kini kujdes nëse keni ndërmend të praktikoni aktivitete të ekspozuara ndaj rreziqeve meteorologjike. Qëndroni të informuar rreth kushteve të pritshme meteorologjike dhe mos merrni përsipër rreziqe të shmangshme”, theksohet tutje./teve1.info/
