Kryetari i Vushtrrisë, Ferit Idrizi, njëherësh kandidat i PDK-së edhe për një mandat, ka thënë se është kërcënuar nga kundërkandidati i tij në balotazh, Sylejman Meholli i Lëvizjes Vetëvendosje.
Ai ka thënë se rasti ka ndodhur mbrëmë, ku pas debatit të realizuar në RTV Dukagjini me Jeta Xharrën
“Pas debatit të sotëm në RTV Dukagjini me Jeta Xharrën, kam qenë objekt i një kërcënimi nga kandidati tjetër. Bashkë me dëshmitarët tjerë, sapo kemi dhënë dëshminë në stacionin e policisë në Prishtinë. Rasti është në trajtim nga institucionet përkatëse. E dënoj këtë akt dhe ju kërkoj ndjesë për shqetësimin. Gara për Vushtrrinë duhet të mbetet garë idesh dhe projektesh, jo kërcënimesh.Unë do të vazhdoj të përfaqësoj secilin qytetar me përgjegjësi dhe dinjitet. Faleminderit nga zemra për secilën thirrje dhe mesazh”, ka shkruar ai.
Lajmi është konfirmuar edhe nga Policia e Kosovës.
“Sot rreth orës 17:30 është pranuar informata për një kanosje në rrugën ‘Xhorxh Bush’ në Prishtinë. Me të marrë informatën policia, ka arritur në vendin e ngjarjes. Aktualisht policia po vazhdon punën për zbardhjen e rrethanave dhe motiveve që karakterizojnë ngjarjen”, ka njoftuar për teve1.info, zëdhënsi i Policisë për rajonin e Prishtinës, Enis Pllana.
Sylejman Meholli në një postim në Facebook, pa përmendur këtë rast ka shkruar se nuk ka “shpije qëndalon rrugën tonë drejt fitores”
“Shpifjeve dhe trillimeve do t’u përgjigjemi me padi dhe procedura gjyqësore – sepse e vërteta është arma jonë më e fortë!Viktimizimi dhe shpifjet e ulëta nuk kalojnë më. Nuk frikësohem nga askush, e aq më pak nga ata që i ka frikësuar humbja!Fitore plebishitare asgjë më pak”, ka shkruar ai
