Asociacioni i Komunave të Kosovës (AKK) është duke e shqyrtuar kërkesën e kryetarit të Komunës së Mitrovicës së Veriut, Erden Atiq, që kjo komunë të bëhet anëtare e AKK-së.
Drejtori i Asociacionit të Komave të Kosovës, Sazan Ibrahimi në emisioni “Ditari” në Tëvë 1 tha se tashmë është informuar organi vendimmarrës dhe në kohë optimale pritet të organizohet Kuvendi i Asociacioni që të merret vendimi final për këtë kërkesë.
”Po dje kemi pranuar kërkesën zyrtare nga Komuna e Mitrovicës së Veriut së bashku me vendimin e MAPL-së që çdo gjë ka qenë në rregull në aspektin e procedurave të marrjes së vendimit në kuvendin komunale të kësaj komunës, ku është shprehur dëshira që t’i bashkohen Asociacionit të Komunave të Kosovës. Ne si sekretariat e kemi informuar organin vendimmarrës në kuadër të Asociacionit dhe tani pritet që në kohë optimale të organizohet edhe Kuvendi i Asociacionit dhe pastaj presim të marrim edhe vendimin final sa i përket kësaj mundësie/kërkese”, ka deklaruar ai.
Ibrahimi tha se çdo takim i Kuvendit të Asociacionit nuk mund të bëhet më herët se një muaj nga data e thirrjes së Kuvendit, pasi kështu është rregulluar me statutin e AAK-së.
“Tashmë Bordi i Asociacionit duhet që të marrë vendim se kur do të mblidhet Kuvendi dhe më të vetmen pikë të rendit të ditës, ku do të jetë kërkesa e Komunës së Mitrovicës së Veriut. Po shpresojmë në një kohë optimale…Në bazë të statutit që e kemi çdo takim i Kuvendit të Asociacionit nuk mund të bëhet më herët se një muaj nga data e thirrjes së Kuvendit. Dmth na gjithmonë duhet të paraplanifikojmë një muaj më herët që të mblidhet AKK-së. Kështu është rregulluar me statutin e AAK-së dhe neve si Asociacion duhet të jemi shumë të kujdesshëm nga marrja e këtyre vendimeve sepse dikush tjetër mund t’i kontestojë që nuk kanë qenë në harmoni me statutin, pasi këto vendime nuk mirën shumë shpesh. Dmth janë vendime që mirën shumë rrallë… duhet që të jemi të kujdesshëm dhe t’i përcjellim të gjitha hapat që janë me statutin e Asociacionit”, ka shtuar ai.
Ndryshe, Mitrovica e Veriut, komunë me shumicë serbe, ka nisur procedurat për t’u anëtarësuar në Asociacionin e Komunave të Kosovës, para një muaji.
Përmes një shkrese drejtuar Asociacionit, Kryetari Erden Atiq, ka kërkuar që komuna që ai e drejton të bëhet pjesë e AKK-së.
“Si kryetar i komunës së Mitrovicës së Veriut, ju njoftoj se me qëllim të mbrojtjes dhe promovimit të interesave të përbashkëta komunale, bazuar në nenin 31 dhe 32 të Ligjit për qeverisjen lokale, në bashkëpunim me Kuvendin Komunal të Mitrovicës së Veriut, kemi filluar procedurat për anëtarësim të komunës së Mitrovicës së Veriut në Asociacionin e Komunave të Kosovës”, thuhet në shkresë.
