Ibrahimi në Tëvë1 tha se javën e kaluar Bordi Ekzekutiv i Asociacionit të Komunave të Kosovës ka vendour që Asociacioni të ngre padinë ndaj Ministrisë së Arsimit dhe Ministrisë së Shëndetësisë, sepse sipas tij, këto dy ministri janë palë nënshkruese të kontratave kolektive.
“Me këto kontrata kolektive niveli qëndror ka synuar në atë kohë që të përkrahë mësimdhënësit dhe mjekët, mirëpo barrën financiare ia ka lënë komunave, dhe për këtë arsye komunat e Kosovës qe disa raste e kanë ngritur zërin e vet dhe përmes Asociacionit kanë kërkuar tash që të bëhet një padi kundër këtyre dy ministrive”, tha ai.
Tutje Ibrahimi tha se AKK-ja nuk është kundër kontratave kolektive, por sipas tij, Qeveria duhet t’i marrë shpenzimet financiare.
“Më duhet të thekoj që AKK-ja dhe komunat nuk janë kundër kontratës kolektive, mirëpo kërkojnë që të zbatohet aty neni që përcakton që shpenzimet duhet t’i marrë Qeveria. Pra për zbatimin e kontratave kolektive përgjegjëse financiare është Qeveria e Kosovës dhe deri më tani nuk e ka bërë këtë gjë”, shtoi ai.
Teksa theksoi se AKK-ja vazhdimisht ka kërkuar që barra financire të merret nga nga niveli qëndror e jo nga komunat sepse sipas tij, komunave po iu mirren mjete financiare të cilat janë të dedikuara për investime kapitale e investimet kapitale nëse nuk bëhen sipas tij, jeta e qytetarit nuk përmirësohet./teve1.info/.