Njohësi i sigurisë, Nuredin Ibishi, ka vlerësuar angazhimin e FSK -së dhe ekipeve të tjera përkatëse në operacionin e kërkim-shpëtimit që rezultoi me gjetjen e trupit të pajetë të një 33-vjeçari në Liqenin e Ujmanit.
Ai ka theksuar se ekipet e kërkim-shpëtimit nga Kosova kanë dëshmuar profesionalizëm dhe guxim edhe në raste të tjera në rajon, sidomos në terrene të vështira si lumenjtë dhe liqenet.
I pyetur se a po politizohet ky rast nga partitë politike, ai u përgjigj se nga partia në pushtet po politizohet më shumë ngase po atribuon vetën sikur të jetë rasti i parë.
“Ekipet e kërkim-shpëtimit jo vetëm në Kosovë por edhe në rajon kanë qenë shumë të njohura për vendet bregdetare kur na kane ftuar që të nxjerrim personat të përmbytur në ujërat sidomos të rrëmbyeshme lumenj dhe liqen që kemi treguar një guxim një profesionalizëm të veçantë, mendoj që kjo është një lëvdatë së pari për një mision në veri pra të FSK-së ngase edhe emergjenca janë pjesë e mandatit të FSK-së, por edhe njëkohësisht profesionalizmi i shkëlqyeshëm të zhytësve të Kosovës……Secila parti po e zgjedh veten në një formë , partia në pushtet më shumë ngase po e atribuon vetën në atë se po llogaritet sikur rasti i parë, ka pas raste edhe mëhershme”, ka deklaruar Ibishi në emisionin “Ditari” në Tëvë1.
Ndryshe, të martën pasdite është gjetur trupi i pajetë i 33-vjeçarit, i cili ishte raportuar si i zhdukur që nga data 27 korrik 2025, në Liqenin e Ujmanit, në veri të vendit.
Gjetjen e tij e ka komfirmuar e FSK-ja përmes një postimi në rrjetin social Facebook, dyshohet se i ndjeri kishte kërcyer nga ura dhe nuk kishte dalë më nga uji. Menjëherë pas raportimit të rastit, Forca e Sigurisë së Kosovës, në bashkëpunim me Agjencinë për Menaxhim të Emergjencave (AME), Policinë e Kosovës dhe me mbështetjen e KFOR-it, nisi operacionin e kërkim-shpëtimit.
Pas një kërkimi intensiv disa orësh dhe falë përkushtimit e profesionalizmit të ekipeve në terren, trupi i pajetë është gjetur në zonën e liqenit të Ujmanit. Menjëherë pas evakuimit nga uji, trupi i viktimës iu dorëzua Policisë së Kosovës dhe ekipit të forenzikës për procedurat e mëtejme ligjore.
Ky rast ka rikthyer në vëmendje rëndësinë e bashkëpunimit ndërinstitucional dhe përkushtimin e strukturave të sigurisë në situata emergjente./teve1.info/
