Njohësi Nuredin Ibishi ka deklaruar se posti i kryeministrit do të jetë një ‘mollë sherri” për formimin e qeverisë së re.
Megjithatë Ibishi vlerëson se në këtë drejtim do të arrihet ndonjë kompromis.
“Mes dëshirave dhe mundësive ka diferencë. Natyrisht që mollë sherri do të jetë posti i kryeministrit. Po flas për këto koalicionet prej dy partive të forta të opozitës. Ato janë lidhur me kusht pra do të hyjnë në koalicion me kusht që do t’iu ipet posti i kryeministrit. Mendoj që në këtë drejtim ndoshta do të bëhet ndonjë kompromis”, ka thënë ai në emisionin “Info Nata” në Tëvë1.
Ndërkaq për qëndrimin e LDK-së se nuk hyn në koalicion me VV-në nëse nuk e ka postin e kryeministrit, Ibishi ka thënë se ky qëndrim mund të thyhet sikur hera tjera.
“Natyrisht që secili e kërkon hisen apo pjesën e vet që e kushtëzon atë mundësi për hyrje në koalicion. Por mendoj që bisedimet do të sjellin rezultat. Në politikë asnjëherë nuk thuhet jo. Qëndrimi i LDK-së ndër vite është thyer edhe mund të thyhet sërish. Mund të ketë koalicion mes LDK-së dhe VV-së edhe eventualisht PDK-së dhe VV-së krejt varet prej pazarit politik”, ka shtuar ai.
