Anëtari i Kryesisë i Lidhjes Demokratike të Kosovës, Avdullah Hoti, ka deklaruar se partia ka nevojë për lidership të ri.
Për këtë Nuredin Ibishi nga LDK mendon që Hoti e ka pasur shansin e vet dhe tash është lideri i tij.
Tutje, ai tha se brenda LDK është një demokraci e brendshme, por jo edhe një përplasje ashtu siç po përfolët, pasi sipas tij është e drejta e secilit që të ketë kritika.
“Mendoj që kjo është një ide demokratike, e liderve brenda partisë… Por, mendoj që edhe Hoti ka pasur shancën e vet, tash është lideri i ri. Kemi bërë një fushatë të shkëlqyeshme….kemi arritur një avantazh, një ngritje, por jo atë që e kemi pritur dhe e kemi ndjerë gjatë fushatës. Tash normal që ka vend për kritika, është demokraci e brendshme në LDK që ka edhe zëra kundër që ka mundur të jetë edhe më mirë, pse ka pasur privilegjime në listë etj… Është demokraci e brendshme, por jo edhe një përplasje në nivel fare po përfolët”, ka deklaruar ai në emisionin “Këndi i Debatit” në Tëvë1.
Ndryshe, Hoti ka thënë se rezultati zgjedhor i LDK-së nuk është i kënaqshëm e as i përafërt me atë që kemi shpresuar “pas katër vitesh përgatitje”.
“Prandaj, për të kthyer besimin e anëtarësisë dhe elektoratit të gjerë, LDK-ja ka nevojë për lidership të ri. Nuk ka rrugë tjetër për rikthimin e besimit në LDK. LDK-ja ka nevojë për një lidership me qasje ekipore, që është gjithëpërfshirës, me orientime të qarta politike të qendrës së djathtë, që mbledh rreth vetes profesionistë dhe e rikthen LDK-në në epiqendrën e profesionistëve më të mirë të Kosovës, siç ka qenë LDK-ja. LDK-ja ka nevojë për një lidership që punon me transparencë të plotë karshi strukturave partiake në të gjitha nivelet, që e kthen partinë në funksionimin statutar, që merr vendime kolegjiale në bazë të statutit të LDK-së (që është kushtetuta e partisë) dhe në konsultim të gjerë me strukturat qendrore dhe lokale të partisë. LDK-ja ka nevojë për një lidership ekipor që i fashit përçarjet, që tregon kujdes ndaj të gjithë aktivistëve të rinj e të vjetër, që i bën bashkë të gjitha copat e LDK-së në të katër anët e vendit dhe në diasporë”, ka shkruar ai në Facebook.
