Ndërmarrja Publike Hidroekonomike “Ibër-Lepenc”, ka mohuar se ndërprerja e marrëdhines së punës ndaj Agim Pllashnikut ka të bëjë me deklarimet e tij ndaj deputetes Fitore Pacolli apo veprimet e tij politike.
Në një përgjigje për teve1.info nga kjo ndërmarrje është thënë se largimi i tij nga puna ka të bëjë me sjelljet e tij, kërcënuese, shantazhuese e jo profesionale.
“Shqiptimi i masës disiplinore për ndërprerjen e marrëdhënies së punës me zotin Pllashniku nuk ka asnjë lidhje me veprimet politike të tij… Largimi nga puna është bërë për shkak të sjelljes së tij jashtëzakonisht kërcënuese, shantazhuese, jo profesionale dhe në kundërshtim me normat etike, përfshirë kanosjen e drejtpërdrejtë të një anëtari të menaxhmentit të ndërmarrjes”, thuhet nga kjo kompani.
Nga kompania kanë listuar edhe aryeset e largimit të Pllashnikut nga vendi i punës.
“Arsyeja ligjore dhe disiplinore për ndërprerjen e marrëdhënies së punës me z. Agim Pllashniku ka qenë shkelja e rëndë e detyrimeve të punës, fillimisht e manifestuar përmes mosrespektimit të orarit zyrtar të punës dhe largimeve të paautorizuara nga vendi i punës, për të cilat atij i është shqiptuar masë disiplinore – vërejtje me shkrim. Më pas, në të njëjtën ditë, z. Pllashniku ka ushtruar sjellje kërcënuese, jo profesionale dhe jo etike, përfshirë:Kanosje të drejtpërdrejtë ndaj një drejtuesi të lartë të ndërmarrjes,Gjuha fyese dhe shantazhuese ndaj stafit menaxhues,Pengim të punës dhe cenim të autoritetit institucional,Sjellje të përsëritura në kundërshtim me detyrimet e kontratës së punës, Rregulloren për Lidhjen e Marrëdhënies së Punës dhe Përgjegjësinë Disiplinore, si dhe me dispozitat përkatëse të Ligjit të Punës Nr. 03/L-212.Bazuar në të gjitha këto, punëdhënësi I ka shqiptuar masën disiplinore – ndërprerjen e menjëhershme të kontratës së punës”, është thënë nga kompani.
Tutje ata kanë bërë të ditur se gjatë muajit korrik Pllashniku ka kryer veprime që bien ndesh me rregulloren e brendshme duke mbyllur kamerën monitoruese të hyrje – dalje në shumë raste.
“Drejtori i Departamentit i ka shqiptuar vërejtje me shkrim zotëri Pllashnikut. Në të njëjtën ditë të shqiptimit të vërejtjes, z. Pllashniku ka ardhur në selinë qendrore të ndërmarrjes dhe, sipas dëshmive të dëshmitarëve të dhëna me shkrim (pas kërkesës së Sekretarit të ndërmarrjes), ka kanosur me jetë Drejtorin e Departamentit. Ai ka përdorur gjuhë fyese, shantazhuese dhe joprofesionale”, kanë thënë nga “Ibër – Lepenci”.
Nga kjo kompani është thënë se ndaj Agim Pllashnikut është paraqitur kallëzim penal për dy vepra penale.
“Në mbështetje të dispozitave të Kodit të Procedurës Penale të Republikës së Kosovës, Ndërmarrja Publike Hidroekonomike “Ibër-Lepenc” Sh.A. ka paraqitur kallëzim penal kundër z. Agim Pllashniku për shkak se i njëjti ka kryer veprat penale:
“Kanosja” nga neni 181 i Kodit Penal të Republikës së Kosovës, dhe“Pengimi i personit zyrtar në kryerjen e detyrës zyrtare” nga neni 401 i të njëjtit Kod. Kallëzimi penal është parashtruar pranë Prokurorisë Themelore në Prishtinë, në përputhje me të drejtën e subjektit juridik për të mbrojtur integritetin institucional dhe sigurinë e punonjësve të tij”, thuhet tutje.
Avokati Gent Gjini i angazhuar nga familja Pllashniku e ka cilësuar kwtw veprim si një hakmarrje të drejtpërdrejtë pas dorëzimit të kallëzimit penal ndaj deputetes Fitore Pacolli.
Sipas avokatit Gjini, Pllashniku është pushuar nga puna pa asnjë paralajmërim, pa asnjë shkelje të evidentuar dhe pa asnjë bazë ligjore.
