Janë bërë më shumë se një vit e gjysmë që kryetari i Komisionit Rregullativ i Prokurimit Publik, Osman Vishaj është pa mandat.
Sipas vendimit të Kuvendit, atij i ka skaduar afati më 1 nëntor të vitit 2023.
Në Ligjin për Zyrtarët publikë, parashihet që më së shumti një vit mund të ushtrohet një funksion me Ushtrues Detyre por që kjo është tejkaluar.
Kjo situatë po shihet si shqetësuese nga njohësi i prokurimit, Valmir Ilazi.
“Pikë së pari cenohet siguria juridike pasi kur një funksionar qëndron në pozitë me ushtrues detyre për një kohë të gjatë e kemi një gjendje që krijohet e përkohshme ose që bëhet de facto ose që bie ndesh me parimet e një administrate të qëndrueshme dhe profesionale. Kjo situatë dëmton edhe kredibilitetin e institucionit pasi një person me pozitë me ushtrues detyre mund të shihet si më i varur politikisht dhe më pak i llogaridhëshëm”, tha Ilazi.
Si rrjedhojë, edhe vendimet e nxjerra përgjatë kësaj periudhe nuk janë të vlefshme njësoj si me mandat ekzekutiv.
“Në praktikë kjo po anashkalohet sepse çdo vendim i marrë brenda këtij afati është i paligjshëm dhe në rrethana normale nuk duhet të prodhojë efekt juridik. Në këtë kuptim vendimet strategjiike, politike përfshirë emërimet, ndryshimet strukturore apo çdo vendim që ndikon në të ardhmen e institucionit nuk do të duhej të mrrreshin nga një person që e ushtron funksionin në kundërshtim me afatet ligjore”, tha njohësi i fushës së prokurimit.
Kurse nga rrjeti i Organizatave joqeveritare AVONET, këtë e cilësojnë si shkelje e rëndë ligjore e rendit juridik të vendit.
“Çdo vendim që mirret nga këta persona pas kalimit të afatit maksimal prej një viti që është i paraparë në nenin 35 të paragrafit 2 të Ligjit për Zyrtarët Publikë, ato vendime do të konsiderohen të kundërligjshme, por qysh do të bëheshin ato të kundërligjshme? Ato vendime të kundërligjshme do të bëheshin në mënyrë efektive të kundërligjshme nëse palët e interesuara do të ndiqnin rrugët juridike duke i kontestuar aktet e marra nga persoant në fjalë pas kalimit të afatit një vjecar atëehrë të gjitha ato venidme do të shpalleshin të kundërligjshme nga Gjykata”, tha Shefki Berisha.
Tëvë1 ka pyetur Kuvendin e Kosovës dhe Qeverinë për arsyen e mosemërimit të kësaj pozite.
Mirëpo gjatë javës asnjë nga këto institucione nuk kanë kthyer përgjigje.
Komisioni Rregullativ i Prokurimit Publik, është njëri prej tri organeve qendrore që funksionon në fushën e tenderimit.
Aktualisht, ka disa pozita në shumë institucione përfshirë Ministri të ndryshme, që pozitat janë me ushtrues detyre – shqetësim i cili u paraqit edhe nga raportet financiare vjetore të Zyrës Kombëtare të Auditimit.
