I plagosuri me armë zjarri në Ferizaj në gjendje stabile.
Personi i plagosur me armë zjarri në Ferizaj i cili ishte transferuar në Qendrën Emergjente të QKUK-së, është në gjendje stabile shëndetësore.
Kështu ka njoftuar drejtori i Qendrës Emergjente, Naser Syla për teve1.info.
“Është trajtuar në Qendrën Emergjente një i plagosur me armë zjarri, 40 vjeçar, që është në gjendje stabile. Pas intervenimit në sallën operative të QE nga ekipet e anestezionit dhe Klinikës Abdominale, është transferuar në Klinikën Abdominale për trajtim të mëtutjeshëm”, deklaroi Syla.
Policia ka njoftuar se mbrëmë një person është plagosur me armë zjarri në Ferizaj.
I dyshuari i cili është i njohur për policinë është në kërkim.
“Një mashkull kosovar ka mbetur i plagosur pasi në drejtim të tij dyshohet se ka shtënë me armë i dyshuari mashkull kosovar. Në vendin e ngjarjes janë gjetur dhe sekuestruar 3 gëzhoja. Viktima është dërguar për trajtim mjekësor në QKUK, ndërsa i dyshuari (i njohur për policinë) është në kërkim policor. Lidhur me rastin është njoftuar prokurori, i cili ka urdhëruar fillimin e hetimeve”, është bërë e ditur nga Policia.
