Një person në Gjakovë është arrestuar si i dyshuar për mbajtje me forcë të dy viktimave dhe kanosje të tyre me armë zjarri, ka njoftuar Policia e Kosovës.
Sipas njoftimit të mërkurën rreth orës 19:25 një qytetar ka informuar policinë se ai dhe motra e tij kishin qenë të mbajtur nën kërcënimin e armës në shtëpinë e të dyshuarit.
Qytetari sipas Policisë kishte arritur të ikte, ndërsa motra e tij kishte mbetur brenda e mbajtur nga i dyshuari, i cili thuhet se është bashkëshorti i viktimës.
“Menjëherë pas marrjes së informacionit, njësitë policore, përfshirë njësinë e hetimeve dhe NJRSH-në, kanë dalë në vendin e ngjarjes. Falë reagimit të shpejtë dhe profesionalizmit të treguar, është arritur që i dyshuari të arrestohet”, thuhet në njoftim.
Po ashtu bëhet e ditur se gjatë ndërhyrjes dhe kontrollit të realizuar në shtëpinë e të dyshuarit është gjetur dhe sekuestruar një armë zjarri automatike e cila dyshohet se është përdorur në rast, 54 copë fishekë, si dhe një sasi e vogël e dyshuar substancë narkotike.
Viktimës i është ofruar ndihmë mjekësore për shkak të lëndimeve të pësuara, ndërkaq me vendim të prokurorit të shtetit thuhet se ndaj të dyshuarit është iniciuar procedurë ligjore dhe i njëjti është ndaluar në mbajtje për procedura të mëtejshme./teve1.info/
