Burri i dyshuar për vrasjen e një besimtari mysliman në një xhami franceze është dorëzuar në polici në Itali, thanë autoritetet të hënën.
Policia franceze nisi kërkimet menjëherë pas sulmit në La Grande Combe në Francën jugore. Sulmuesi regjistroi sulmin në telefonin e tij dhe pamjet e kamerave të sigurisë treguan se ai bërtiste duke fyer Zotin, thanë mediat lokale.
Zyra e ministrit të brendshëm francez tha të hënën se i dyshuari ishte dorëzuar në policinë në Itali, pa dhënë detaje, raporton AP.
Prokurori vendas Abdelkrim Grini tha të dielën se hetuesit po marrin parasysh “mundësinë që ky të ishte një akt islamofobik. Është ai për të cilin po punojmë fillimisht, por nuk është i vetmi,” tha ai.
I dyshuari është një 21-vjeçar i lindur në Francë, i cili jetonte në zonë dhe nuk kishte precedentë penalë, tha prokurori.
“Racizmi dhe urrejtja e bazuar në fe nuk do të kenë kurrë vend në Francë”, tha presidenti francez Emmanuel Macron. “Liria fetare është e pacenueshme.”
Një marshim u mbajt të dielën në La Grand Combe në mbështetje të viktimës dhe një tubim kundër krimeve anti-islame u mbajt në Paris.
