Sipas komunikatës së lëshuar nga Prokuroria, i pandehuri F.M., deri më datën 2 gusht të këtij viti, përmes basteve të luajtura me Sh.H, ka përfituar nga ky i fundit 60 mijë euro.
“Nga data e pavërtetuar e deri më 02 gusht 2022 në një kafiteri në Gjakovë, me qëllim të përfitimit të kundërligjshëm të dobisë pasurore për vete dhe duke vepruar në kundërshtim me Ligjin për Ndalimin e Lojërave të Fatit, organizon dhe merr pjesë në zhvillimin e veprimtarisë së lojërave të fatit – baste sportive, ku nga bastet e luajtura nga Sh. H., i pandehuri përfiton para në shumën prej 60 mijë 000 euro”, thuhet në komunikatë.
Sipas njoftimit, me këto veprime i dyshuari ka kryer veprën penale, “Organizimi i skemave piramidale dhe bixhozit të paligjshëm” nga neni 294 paragrafi 3 lidhur me paragrafi 2 të KPRK-së.
Gjithashtu, i pandehuri F.M., deri më 09 gusht 2022, pa autorizim, ka mbajtur armë dhe municion në kundërshtim me Ligjin e zbatueshëm lidhur me armët, ku të njëjtat i janë konfiskuar nga ana e policisë.
