Autore: Adea Mustafaj
E nisi ditën më ndryshe se siç bën zakonisht.
Në vend se të punonte, Beqir Lahi, u ul në karrige para vendit ku kalon çdo ditë.
Në bluzën e tij të punës ka vendosur një mbishkrim: “Unë jam në grevë”.
Paga jo e plotë të cilën e mori këtë muaj, e shtyri drejt këtij veprimi, këtë punëtor të ndërmarrjes “Gjelbër” në kryeqytet.
Nëse nuk i jepet një zgjidhje, ai paralajmëron se grevën do të vazhdojë deri në plotësimin e kërkesës.
“Unë jom hi në grevë, është veç shkaku, çështja e pagës. Unë e kom pagën me vendim 400 euro, tash më ka dal rroga 250 euro. Kjo është arsyeja e parë që kom dal. E dyta arsye, paga jem nuk ma mbulon mu kredinë mujore, 310 euro i kom kredi, kom rrymë pa pagu 50 euro, kom tatimet, kom faturën e mbeturinave, i kom fëmijët nëpër shkolla. Kështu që me 250 euro, mu po më duhet me hi në borxh dikun, pikë së pari me la këstin e kredisë. E për këtë jom hi në grevë”, thotë Lahi.
Nga ndërmarrja “Gjelbër”, thanë për televizionin se Komuna e Prishtinës nuk ka arritur t’ia paguaj borxhet ndërmarrjes.
Prandaj, edhe pagat u ekzekutuan të përgjysmuara.
“Komuna e Prishtinës nuk ka arritur t’i paguaj borxhet ndaj ndërmarrjes për shërbimet të cilat ajo ka ofruar. Rrjedhimisht Ndërmarrja ka arritur t’i paguaj vetëm 50% të pagave për punëtorët e saj. Shpresojmë që në ditët në vijim Komuna e Prishtinës të sigururoj fonde shtesë në mënyrë që të bëhet edhe pagesa e mbetur”, kanë thënë nga kjo ndërmarrje.
E sipas Komunës, detyrimet ndaj ndërmarrjes janë paguar deri në korrik, ndërsa për pagat përgjegjës mbetet menaxhmenti i ndërmarrjes.
“Çështja e grevës së punëtorëve të ndërmarrjes “Gjelbër” (ish-Hortikultura) ka të bëjë me pagat e punëtorëve për të cilat menaxhmenti i lartë i ndërmarrjes ka obligimin e përkujdesjes dhe përgjegjësisë, ndërsa sa i përketë raportit kontraktual apo punëve të kryera sipas kontratës në shtëpi, Drejtoria e Parqeve, respektivisht Kryeqyteti, e ka bërë pagesën e detyrimeve deri në muajin korrik, teksa jemi në përpjekje që edhe muajin që shkoi ta përmbyllim”, ka thënë Donika Çeta, drejtoreshë në Drejtorinë e Hapësirave Publike dhe Parqeve.
Ndërsa për kërkesa të tjera jashtë kësaj kontrate, ata thanë se nuk kanë asnjë kompentencë, qoftë funksional apo lëndore.
E ndonëse protestën e nisi i vetëm, Lahi thotë se ka marrë përkrahje edhe nga punëtorë të tjerë të ndërmarrjes.
