Policia e Kosovës ka arrestuar një inspektor të Ministrisë së Financave, Punës dhe Transfereve, pasi i njëjti dyshohet se ka keqpërdorur pozitën zyrtare.
Ai dyshohet se i ka bërë favore kompanisë ku punonte dhe i njëjti me urdhër të prokurorit është dërguar në mbajtje.
“Lidhur me rastin me datën 26.06.2023 është arrestuar i dyshuari mashkull kosovar, inspektor në Ministrinë e Financave, Punës dhe Transfereve i cili dyshohet të ketë kryer veprën e lart-cekur.. Me këtë rast i dyshuari dyshohet se i ka bërë favor kompanisë ku punonte viktima. Me vendim të prokurorit i dyshuari është dërguar në mbajtje”, thuhet në raportin e policisë.
Ndryshe, dje gjatë ditës policia ka raportuar se i njëjti dyshohet se ka mashtruar në raport zyrtar, duke thënë se viktima ishte rrëzuar në shtëpi, edhe pse i njëjti ishte rrëzuar e kishte pësuar lëndime në vendin e punës.
“Dyshohet se personi i lartcekur ka dal në vendin e ngjarjes, gjegjësisht në një vend punishte të një kompanie, në të cilën vend punishte ishte lënduar një punëtor i kësaj kompanie, duke marrë lëndime të rënda trupore dhe i njëjti (Inspektori i Punës A.H.) edhe pse ishte venë në dijeni edhe nga hetuesit policor se punëtori ishte lënduar në vendin e tij të punës, për çka kishte edhe dëshmi video-incizim dhe dëshmitar eventual, i dyshuari përkundër këtyre fakteve, përpilon “Raport Zyrtar” për Hetimin e Aksidentit, duke mos e paraqitur gjendjen faktike/reale në ketë raport, por ka potencuar se viktima ishte rrezuar në shtëpinë e tij, duke i bërë favor me këtë rast pronarit të kompanisë punë kryese”, thuhet në njoftimin e policisë.
Arrestohet inspektori i punës, fshehu faktin që viktima ishte rrëzuar në vendin e punës
