Kandidati i Lëvizjes Vetëvendosje për Komunën e Gjilanit, Alban Hyseni, ka ushtruar të drejtën e votës në raundin e dytë të zgjedhjeve lokale, nën shoqërinë e bashkëshortes së tij.
Pas votimit, Hyseni ka inkurajuar qytetarët që të marrin pjesë masivisht në procesin zgjedhor, duke theksuar rëndësinë që kanë zgjedhjet lokale për zhvillimin dhe mirëqenien e komunitetit.
“Sapo përfundova një obligim qytetarë që na takon secilit prej nesh. Në këto gjysmë ore që shpenzojnë gjatë ditës së diele do ta determinojnë të ardhmen tonë dhe fëmijëve tanë. Prandaj besoj që është tejet e rëndësishme që të shfrytëzohet e drejta e votës, që të vendoset për bindjen tonë, të ardhmen tonë, dhe në këtë formë pra edhe të kemi një të ardhme më të ndritshme për gjithë ne”, tha Hyseni.
Ai gjithashtu falënderoi qytetarët e Gjilanit për sjelljen dhe pjekurinë demokratike që kanë treguar gjatë procesit, duke i cilësuar si shembull për maturi dhe qetësi.
Alban Hyseni, në balotazh në kuadër të zgjedhjeve lokale, garon kundër Arbër Ismajlit kandidat i LDK-së për kryetar të Komunës së Gjilanit.
Hyseni në rundin e parë mori 49.80% dhe ishte shumë afër që të fitonte pa balotazh, ndërsa Arbër Ismajli 34.29%.
