Deputeti i LDK-së, Ekrem Hyseni, propozimin e sotëm nga ky subjekt politik për formimin e një qeverie të transicionit e sheh të vetmen mundësi për të dalë nga ngërçi politik.
Hyseni thotë se formula e vetme për t’u zhbllokuar Kuvendi dhe të bëhet konstituimi është përkrahja e propozimit të LDK-së.
“Nuk duhet që sot të shikohen interesat personale, duhet të shikohet interesi i përgjithshëm. Ky interes i përgjithshëm nënkupton, rritjen e pagave, lehtësirat e të bërit biznes, përkrahje për fillestarët biznesmenë, përmirësimi i kushteve dhe cilësisë së jetës – këto duhen të jenë prioritet. Duke i pasur këto prioritet nevojitet një zhbllokim. Një prej formulave për zhbllokimin e kësaj situate të krijuar nga partia e parë është propozimi i sotëm”, tha ai në emisionin “Ditari” në Tëvë1.
Ndërkohë, nesër do të mbahet seanca e 11-të për konstituimin e Kuvendit.
Por, një qëndrim të njëjtë karshi propozimit për kryetare të Parlamentit do ta ketë edhe nesër LDK-ja.
Hyseni thotë se LDK-ja nesër do të ketë qëndrim të njëjtë sa i përket koalicionit me VV-në dhe votimit që Albulena Haxhiu të bëhet kryeparlamentare.
“Qëndrimi i LDK-së është i njëjtë ndaj një koalicioni me VV-në, qëndrimi është i njëjtë ndaj kandidates së propozuar për kryetare të Parlamentit. Një marrëveshje politike i zgjidh këto probleme. Marrëveshja më e mirë është një gjithë përfshirje në një fazë kalimtare dhe adresimi i problemeve dhe akuzave që janë të domosdoshme”, deklaroi ai.
LDK-ja, sot, ka propozuar qeveri të transicionit me të gjitha partitë shqiptare.
Kryetari i saj, Lumir Abdixhiku, në një konferencë për media ka bërë të ditur se partia e tij nuk e pranon ftesën e Lëvizjes Vetëvendosje për koalicion. Abdixhiku ka thënë se është i gatshëm për takime me liderë partiakë në momentin e parë që ata duan.
