Deputeti i LDK-së, Ekrem Hyseni pas dështimit të 31-të të seancës për konstituimin e Kuvendit ka deklaruar se numri rendor i seancave po rritet, kurse numri i deputetëve po bie.
Hyseni ka thënë se kjo është një kuvend jofunksional dhe një qeveri pa ligjimitet.
Derisa, ai deklaroi se partia e tij ka dalë me një propozim i cili është prezantuar të enjten nga Abdixhiku për daljen nga kriza politike.
“Ajo që pamë sot është vazhdim i skenarit që rezultatin na e jep gjithmonë të njëjtë, rritet numri rendor i seancave dhe bie numri i deputetëve. Kemi një Kuvend jofunksional, një qeveri pa ligjimitet, ndërkohë që nuk ka asnjë lëvizje që të dilet nga kjo krizë e cila është krizë dhe bllokadë institucionale. Si LDK ne kemi dal me propozimin tonë i cili është prezantuar dje nga kryetari i LDK-së që është një alternativë që e vlerësojmë që është shumë e mirë për daljen nga kjo krizë dhe njëkohësisht të iu jep përgjigje të gjitha atyre problemeve që sot Kosova ballafaqohet. Është propozimi i vetëm deri tani, nuk kemi pasur propozime të tilla”, ka deklaruar Hyseni.
Ndryshe, kryetari i Lidhjes Demokratike të Kosovës, Lumir Abdixhiku, përmes një konference për medie ka shpalosur planin 15-pikësh për “Qeverinë e Unitetit Kombëtar”. Abdixhiku konsideron se ky do ishte opsioni më i mirë për të dalë nga ngërçi politik deri sa të shkohet në zgjedhjet e reja./teve1.info/
