I ftuar në emisionin “Info Nata” me Ardian Visokën në Tëvë 1, Hyseni tha se në këtë Fond mund të mblidhen edhe deri në 10 milionë euro, por që sipas tij, këto janë të pamjaftueshme për ushtrinë për ta dërguar në një nivel tjetër.
“Nashta ju kujtohet kur një fond pak a shumë i tillë ishte krijuar në kohën e pandemisë, kërkesë për ndihmë prej diasporës. I kërkova para se me ardh në studio shifrat sa pare janë mbledh prej atij Fondi. Raportimi i fundit ishte diku 742 mijë euro. Nuk po them që mblidhen kaq, munden me u mbledh ma shumë, munden me u mbledh 5 milionë euro, munden me u mbledh 10 milionë euro, por këto janë jashtëzakonisht të pamjaftueshme, nëse jemi duke thënë po jepim pare për ushtrinë për me çu në nivel tjetër”, tha Hyseni.
Ai shtoi se Kosova ka një problem tjetër, e që sipas tij është kufizimi sa i përket armatimit dhe blerjes së saj.
“Kosova e ka një problem tjetër, Kosova ka kufizime sa i përket armatimit dhe blerjes së saj. Në këtë drejtim, unë e pashë lajmin momentin kur u diskutu për anëtarësim në NATO, aty u kuptu edhe diçka përtej temës së anëtarësimit. SHBA tha se Kosova duhet me i përcjell planin 10-vjeçar të zhvillimit të FSK-së dhe mos me deviju. Çka besoj që ish dashtë me bë njerëzit që udhëheqin në Kosovë është me lobu për me i hjek ato kufizime edhe për me mujt me ble armatim”, shtoi Hyseni.
Anëtari i PSD-së shtoi se për bindjen e tij themelimi i Fondit të Sigurisë do të duhej të ishte hapi i fundit.
“Nuk është keq që ka ndodh kjo, mirëpo në anën tjetër për bindjen time diçka e tillë duhet me ndodh vetëm si hapi i fundit, vetëm kur Kosova nuk ka zona buxhetore, nuk ka pare edhe është ashtu situata emergjente kur kërkon prej secilit”, theksoi Hyseni. /Teve1.info/
