Deputeti i Lidhjes Demokratike të Kosovës, Ekrem Hyseni ka thënë Lëvizja Vetëvendosje nuk i ka votat për zgjedhjen e Albulena Haxhiut për kryeparlamentare.
Ai ka thënë se partia fituese e zgjedhjeve të 9 shkurtit duhet të reflektojë dhe se nuk mund të imponojë kandidat.
Hyseni në emision “InfoNata” ka thënë se Lidhja Demokratike e Kosovës nuk ka ndryshuar qëndrim dhe kriza mund të kalohet nëse LVV arrin marrëveshje me ndonjë nga partitë opozitare.
“Lëvizja Vetëvendosje nuk mundet me kaluar Albulena Haxhiun, duhet të reflektoj edhe barra për zgjidhje i bije asaj, si partia e parë. Nuk mund të imponojë asnjë kandidatë kur nuk i ka numrat dhe jam shumë i sigurt që kanë kontakte me disa nga partitë opozitare dhe mendoj që mundet me kaluar si emër, por LDK nuk do ta përkrah”, ka thënë Hyseni.
Ai ka thënë se Lëvizja Vetëvendosje duhet të ndryshojë qasje sa i përket bashkëpunimit me partitë tjera, duke kujtuar gjuhën e kësaj partie gjatë fushatës zgjedhore.
Të martën për të tetën herë ka dështuar konstituimi i Kuvendit.
