Elseid Hysaj nuk ka të ardhme te skuadra e Lazios, pasi ekipi italian nuk llogarit në shërbimet e tij as për ndeshjet evropiane e as ato kampionale.
Lazio të enjten ka dorëzuar listën përfundimtare të futbollistëve që trajneri Marco Baroni do t’i ketë në dispozicion për Ligën e Evropës dhe Serie A.
Në asnjërën prej këtyre dy listave nuk figuron emri i Hysajt, që do të thotë se reprezentuesi i Shqipërisë nuk bën pjesë fare në planet e Lazios për këtë sezon, në të cilin duket se do të jetë vetëm spektator.
Hysaj ka ende kontratë me Lazion, por nuk do të luajë në asnjë ndeshje të ekipit në sezonin 2024/25, që do të thotë se 30-vjeçari është i lirë në largohet në afatin kalimtar të janarit.
Deri më tani, Hysaj ka vetëm dy paraqitje apo nëntë minuta lojë në kampionat për Lazion, ekip me të cilin ka kontratë deri në verën tjetër.
Ai është pjesë e Lazios prej vitit 2021 kur iu bashkua nga Napoli, ndërsa karrierë në Itali ka bërë edhe te skuadra e Empolit.
