Huthitët e Jemenit po sinjalizojnë se kanë ndaluar sulmet e tyre kundër Izraelit dhe anijeve në Detin e Kuq, ndërsa një armëpushim i paqëndrueshëm vazhdon në Rripin e Gazës.
Në një letër pa datë drejtuar Brigadave al-Qassam të Hamasit, të publikuar në internet nga grupi, Huthitët dhanë sinjalin e tyre më të qartë se sulmet e tyre janë ndalur.
“Ne po monitorojmë nga afër zhvillimet dhe deklarojmë se nëse armiku rifillon agresionin e tij kundër Gazës, ne do të kthehemi në operacionet tona ushtarake thellë brenda entitetit sionist dhe do të rivendosim ndalimin e lundrimit izraelit në Detin e Kuq dhe atë Arabik”, thuhet në letrën nga Gjeneral Major Yusuf Hassan al-Madani, shefi i shtabit të ushtrisë Huthit.
Huthitët nuk kanë ofruar asnjë njoftim zyrtar se fushata e tyre në rajon është ndalur.
Ushtria izraelite, e cila ka nisur sulme duke vrarë udhëheqës të lartë Huthit, nuk pranoi të komentojë të martën kur u kontaktua nga Associated Press.
Huthët fituan famë ndërkombëtare gjatë luftës Izrael-Hamas me sulmet e tyre ndaj anijeve dhe Izraelit, të cilat ata thanë se kishin për qëllim detyrimin e Izraelit të ndalonte luftimet.
Që nga fillimi i armëpushimit më 10 tetor, grupi nuk ka marrë përsipër asnjë sulm.
