Ish-drejtori i Doganës, Naim Huruglica ka thënë ndalimi i mallrave serbe në Kosovë nuk mund ta dëmtojë siç pretendohet ekonominë e Serbisë.
Huruglica në emisionin “Ditari” në Tëvë 1 ka deklaruar se një vendim i tillë mund të ndikojë negativisht në sektorin privat, pasi sipas tij, shumë biznese nga ta furnizohen me lëndë të parë.
“Dorën në zemër unë besoj se nuk mund të ketë ndonjë efekt real pozitiv në ekonomin tonë. Mund të ketë negative pasi një pjesë e madhe e ekonomisë tonë furnizohet me lëndë të parë nga Serbia ose p.sh përmes saj si rrugë transite…Kjo mund të paraqesë pengesë për një pjesë të sektorit privat, i cili do të këtë mungesë të lëndëve të para… Në aspektin ekonomik shumë njerëz i ekzagjerojnë kapacitetet ekonomike të Kosovës në raport me eksportin e Serbisë….dhe të dhënat e vitit 2021-2022 tregojnë se ajo që Serbia eksporton në Kosovë për ekonominë e saj nuk paraqet më shumë se 1.2 ose 1.5 për qind të totalit të eksportit. D.m.th se nëse dikush mendon prej neve se më kësi ndalesa ne mundemi më i bë dëme serioze ose real ekonomisë së Serbisë mendoj që e ka gabim. Kjo mund të jetë simbolike në atë mënyrën që me i tregu se na nuk e lejojmë atë të sillet në këtë mënyrë ndaj kufijve të Kosovës”, ka thënë ai.
Huruglica tha se deri më tani nuk ka parë një vendim që është bërë ndalesë totale e mallrave serbe, por sipas tij, nëse qëndron duket të publikohet.
“Unë nuk kam parë një vendim të tillë edhe pse mbrëmë është përmend se ka filluar një ndalesë, por unë sa kuptova nuk është një ndalesë e plotë, por ju jepe të drejtë autoriteteve kufitare që të bëjnë kontrollime sipas vlerësimit të rrezikut. Akoma nuk e kam parë që është një vendim, apo nuk jam në dijeni që ka një vendim strikt që i ndalon mallrat që të hynë. Pra, është rritur kontrolla ndaj mallrave që hynë por, s’ka një ndalesë strikte edhe pse në fillim është krijuar përshtypja që është bërë një ndalesë e plotë. Pra unë prapë po them se nuk kamë parë një vendim, së paku publikisht për një ndalim të plotë të mallrave… nëse është një vendim zyrtare duhet që të dalë publikisht dhe të merret si vendim”, ka thënë ai.
