Njohësi i fushës së energjisë, Naim Huruglica ka folur rreth mënyrave se si mund të gjenden zgjidhje të qëndrushme për furnizim me energji elektrike.
Huruglica tha se njëra prej mënyra ku do të ndikonte Qeveria do të ishte subvencionimi i ndërtimit të sistemeve solare.
“Unë mendoj që ka edhe opsione të tjera afatshkurtra të cilat në realitet nuk është që s’japin rezultate të shpejta. Për shembull sektori i biznesit, shumë prej kompanive që unë jam në dijeni kanë shfaq gatishmëri që të ndërtojnë sistem solar mbi objektet e tyre, ta zëmë t’i shfrytëzojnë kulmet e tyre dhe të pavarësohen në një mënyrë nga konsumi i energjisë elektrike. Në rastin konkret në qoftë se Qeveria e sheh këtë mundësi me nda financim të caktum, me subvencionu një gjë të tillë mendoj që do të jetë interes bukur i madh i kompanive, mos të them edhe i ekonomive familjare po edhe kompanive”, ka thënë Huruglica.
Tutje ai ka shtuar se një tjetër ide është zgjerimi i rrjetit të kogjenerimit edhe në qytete tjera përveç Obiliqit.
“E dyta, unë për shembull po të isha në vend të ministres së Ekonomisë do të kisha punu në zgjerimin sa më të shpejtë të mundshëm të rrjetit të kogjenerimit. Energjia elektrike gjatë dimrit në masë të madhe shkon për ngrohje, ajo dihet në Kosovë. Sipas informatave që unë i kam, aktualisht as 50 % e avullit që prodhohet në Obiliq nuk përdoret për ngrohje. Domethënë ajo është ndoshta investimi më i shpejt edhe që jep rezultate, pse mos të shtrihet rrjeti në Fushë Kosovë, Lipjan, në Vushtrri apo në qytete tjera ku faktikisht do të arriheshin efekte multiplikuese, do të siguroheshin ata banorë nga përdorimi, mos me i shkatërru pyjet, do të ulej kostoja për ta, do ta ulnim sasinë e shpenzume të energjisë elektrike”, ka deklaruar Huruglica në Këndin e Debatit në Tëvë 1.