Ish-deputeti i pavarur i Kuvendit të Kosovës, Fatmir Humolli, ka komentuar fjalët përmbyllëse të ish-krerëve të Ushtria Çlirimtare e Kosovës në Hagë, gjatë një interviste në emisionin “Info Nata” në Tëvë1.
Ai u ndal te deklaratat e Hashim Thaçi, Kadri Veseli, Rexhep Selimi dhe Jakup Krasniqi, duke thënë se ato përmbyllin në tërësi luftën e UÇK-së.
“Vlerësimi im personal është se secili nga të akuzuarit nga Gjykata e Hagës ka dhënë një deklarim që përmbyll në tërësi luftën e UÇK-së, ashtu siç është zhvilluar lufta çlirimtare e Kosovës dhe siç është rritur Ushtria Çlirimtare e Kosovës. Secili, në thelbin e deklarimeve të tyre, ka theksuar se UÇK-ja ka qenë një ushtri popullore dhe kombëtare, që nuk ka pasur mision kundër popujve të tjerë, por vetëm kundër pushtuesit serb”, ka thënë Humolli.
Ai e cilësoi të padiskutueshme pafajësinë e ish-krerëve të UÇK-së, duke e krahasuar situatën me një verifikim identiteti.
“Kjo është e padiskutueshme që janë të pafajshëm. Është njëjtë sikur dikush të më kërkojë letërnjoftimin për të vërtetuar nëse jam unë apo jo. Tendenca e armiqve tanë ka qenë të vërtetojnë nëse UÇK-ja ka qenë e pastër apo jo, dhe këtë kanë dashur ta bëjnë përmes Hashim Thaçit dhe përmes një lufte speciale kundër Ushtrisë Çlirimtare të Kosovës”, është shprehur ai.
Sipas Humollit, deklarimet e dhëna në Hagë përbëjnë një “vulë” që, siç tha ai, dëshmon se lufta e UÇK-së ka qenë një përballje mes demokracisë dhe autokracisë.
Ai shtoi se procesi gjyqësor ka zgjatur jashtëzakonisht shumë, duke e krahasuar me periudha të tjera historike, dhe theksoi se Jakup Krasniqi, sipas tij, është shembull i përballjes me drejtësinë ndërkombëtare.
Duke folur për emocionet që i kanë ngjallur këto deklarata, Humolli tha se është e natyrshme që vuajtjet të prekin secilin.
“Është normale që vuajtjet e njerëzve të ngjallin emocione te secili. Luftëtari pa emocione nuk do ta merrte pushkën për të luftuar kundër pushtuesit. Këto deklarime janë të natyrshme dhe kanë ndikim te qytetarët”, ka përfunduar Humolli.
