Mbi 20 milionë euro do t’i kushtojë buxhetit të Kosovës pagesa për kompaninë amerikane Countur Global. Kjo pasi vendi ynë humbi betejën në Gjykatën e Arbitrazhit, përball kompanisë amerikane. E një gjë të tillë juristët po vlerësojnë si një imazh i keq për Kosovën dhe sidomos për investitorët e huaj.
Në këtë vend, në vitin 2020 pritej të ndërtohej termocentrali Kosova e Re.
E ndërtimi i tij, pritej të përfundohej gjatë këtij viti, ku jetëgjatësia ishte llogaritur 40 vjet.
I vlerësuar si një nga investimet më të mëdha të huaja në Kosovë në vlerë prej 1.3 miliardë euro, ky projekt nuk u finalizua.
Kjo pasi kompania amerikan Contour Global, vendosi të tërhiqet nga ky investim ndërsa në mars të vitit 2020 e dërgoi Kosovën edhe në Gjykatën e Arbitrazhit Ndërkombëtar për mosrespektim të kontratës.
E për këtë, kompania amerikane do të përfitojë nga buxheti i vendit mbi 20 milionë euro, pasi Kosova e humbi rastin.
Avokatura Shtetërore e ka pranuar vendimin final të Gjykatës Ndërkombëtare të Arbitrazhit, (ICC).Vendimi i Arbitrazhit e obligon Republikën e Kosovës që t`ia paguaj Countur Global-it shumën prej 20,053,125.63 euro. Avokatura Shtetërore dhe përfaqësuesi ligjor i kontraktuar e kanë analizuar vendimin final të arbitrazhit dhe i njëjti do të sfidohet në gjykatën civile në Mbretërinë e Bashkuar.
Humbja përball kompanisë amerikane, sipas Ministrisë së Drejtësisë është humbja e parë, pasi Republika e Kosovës nuk ka pasur asnjë rast të tillë.
Por njëjtë nuk thotë, juristi, Atnon Nrecaj, pasi sipas tij në kontestet gjyqësore ndërmjet shtetit të Kosovës dhe kompanive private, janë humbur miliona euro që nga viti 2008.
E humbja si kjo e fundit në Gjykatën e Arbitrazhit ka edhe pasoja tjera përveç humbjes së parave nga buxheti.
Në fund të vitit 2017, Qeveria e Kosovës e pati nënshkruar marrëveshjen komerciale me kompaninë amerikane, Contour Global, për ndërtimin e Termocentralit ‘Kosova e Re” me kapacitet 500 megavat.
