Mëngjesi i të premtes ishte tragjik për familjen Sopaj nga Malisheva.
Në një aksident trafiku humbën jetën burrë e grua mërgimtarë, ndërsa dy fëmijët e tyre të moshës 5 dhe 3 vjeç, mbetën të lënduar. Fëmijët po trajtohen në Qendrën Klinike Universitare të Kosovës.
Nga informacionet e marra në Klinikën Emergjente, fëmijët kanë pësuar lëndime të rënda trupore, por gjendja e tyre është stabile dhe janë jashtë rrezikut për jetë.
E rastin në fjalë e ka konfirmuar edhe Policia e Kosovës.
“Rreth orës 04:40 kemi pranuar informatën se në rrugën Prishtinë – Podujevë, ka ndodhur një aksident trafiku me pasoja fatale. Në këtë aksident kanë qenë të përfshira, një veturë (me targa të huaja) e cila ka qenë në lëvizje dhe një autobus. Si pasojë e aksidentit lëndime të rënda trupore kanë pësuar katër persona, dy prej tyre nuk kanë arritë të përballojnë plagët dhe të njëjtit kanë ndërruar jetë”, thuhet në njoftimin e Policisë.
Policia e Kosovës poashtu ka apeluar tek të gjithë pjesëmarrësit në trafik që të kenë kujdes më të shtuar.
Vetëm në gjashtë muajt e parë të këtij viti kanë ndodhur 44 aksidente me fatalitet, e ku kanë humbur jetën 50 persona.
Për rastin tragjik ka reaguar edhe kryetari i Komunës së Malishevës, Ekrem Kastrati, i cili u ka shprehur ngushëllime familjarëve, miqve e të afërmve të viktimave.
Raporti i gazetares Valëza Sylejmani.