Një aksident me fatalitet ka ndodhur mëngjesin e sotëm në Pejë, ku si pasojë një person ka humbur jetën.
Policia e Kosovës ka bërë të ditur se rasti ka ndodhur rreth orës 05:20, në rrugën “Konferenca e Bujanit” në Pejë.
“Deri te vetaksidenti dyshohet se ka ardhur derisa drejtuesi i veturës ishte duke qarkulluar nga Vitomirica në drejtim të Pejës dhe me të arritur në rrugën e lartpërmendur, duke mos iu përshtatur shpejtësisë dhe kushteve të rrugës, humb kontrollin mbi automjet dhe godet një shtyllë elektrike të ndriçimit rrugor”, thuhet në njoftimin e Policisë.
Si pasojë e goditjes, ngasësi i veturës pësoi lëndime trupore dhe u dërgua me autoambulancë në Spitalin Rajonal të Pejës, por nuk arriti t’u mbijetojë plagëve.
“Si pasojë e këtij vetaksidenti, ngasësi i veturës ka pësuar lëndime trupore. I njëjti është dërguar me autoambulancë në Spitalin Rajonal në Pejë, aty nga ekipi mjekësor është konstatuar vdekja e viktimës”, ka bërë të ditur Policia.
Me urdhër të Prokurorit të Shtetit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion.
