Trajneri i Arsenalit, Mikel Arteta, tregoi se lojtarët e tij shpërthyen në lot pas eliminimit nga Champions League në gjysmëfinale kundër Paris Saint-Germain, duke theksuar se ndonëse rezultati nuk ishte në favorin e tyre, Arsenali kishte qenë skuadra më e mirë në pjesën më të madhe të dy ndeshjeve.
“Kur analizon të dyja ndeshjet, lojtari më i mirë ka qenë i njëjti – portieri. Dhe Champions League vendoset në zonat e rreptësisë. Donnarumma e fitoi ndeshjen për ta. Kam shumë krenari, por edhe shumë zhgënjim që nuk arritëm të shkonim në finale.”
Arsenali, që humbi edhe finalen e vetme në historinë e tij në këtë kompeticion në vitin 2006, tani do të përqendrohet në tri ndeshjet e fundit të Premier League për të siguruar pjesëmarrjen në Champions sezonin e ardhshëm. Trofeu i vetëm i fituar nën drejtimin e Artetës mbetet FA Cup në vitin 2020.
