Të martën ka filluar “Java Kundër Korrupsion 2023”, e organizuar nga Koalicioni i Organizatave të Shoqërisë Civile “Bashkë kundër Korrupsionit”.
Teksa tregoi më konkretikisht synimin e kësaj tryeze, Hulumtuesi në Institutin e Kosovës për Drejtësi, Flamur Kabashi, njoftoi se gradualisht do të publikohen 8 raporte analitike, ku shfaqen mangësitë në rastet e korrupsionit në Kosovë.
“Gjatë kësaj jave kundër korrupsionit, IKD-ja në bashkëpunim me dy organizata tjera, do të bëjnë publikimin e 8 raporteve analitike, e që të cilat shfaqin në detaje mangësitë në gjykimin e rasteve të korrupsionit dhe të ndjekjeve penale. Qëllimi i javës kundër korrupsionit, është që akterët të cilët merren me rastet konkretisht nga Prokuroria, Gjykatat, por edhe nga vetë institucionet ekzekutive, siç është Ministria e Drejtësisë, të ulen dhe të bashkëpunojnë”, deklaroi Kabashi në emisionin “Ditari”.
Sa i përket trajtimit të rasteve, Kabashi vlerësoi që nuk ka ndikime te gjyqësori, ku njëkohësisht përmendi disa mundësi se si mund të ketë gjykime më të suksesshme.
“Kemi raste kur për shkak të lëvizjeve të mëdha të gjyqtarëve nga departamenti në departament, landa nuk ka arritur të gjykohet. Pastaj veprime të ndryshme procedurale, ku ftesat nuk kanë shkuar tek të akuzuarit, andaj nuk mund të konstatojmë që ka ndikime te gjyqësori, por kanë ndikuar rrethanat të cilat me një vigjilencë më të madhe do të mund të evitoheshin për të pasur gjykime të suksesshme të rasteve”, theksoi Kabashi tutje në Tëvë1.
Po ashtu, ky i fundit tha se ka ende shumë raste të korrupsionit të profilit të lartë.
Kujtojmë se në këtë tryezë kanë marrë pjesë përfaqësues të Shoqërisë Civile, Ambasadës Britanike në Kosovë, Zyrës së BE-së në Kosovë dhe gazetarë./teve1.info/.
