Deputeti i Partisë Demokratike të Kosovës (PDK), Enver Hoxhaj ka reaguar pas lajmit se në Kosovë do të zbarkojë një kontingjent prej 200 ushtarëve britanikë, si kundërpërgjigje ndaj sulmit terrorist të 24 shtatorit.
Sipas Hoxhajt, politika e Qeverisë Kurti ndaj veriut dhe dialogut, është e gabuar dhe se mungesa absolute e një politike të jashtme sipas tij, e ka shëndrruar Kosovën në problem të sigurisë.
Ai madje tha se në vend se sot të diskutohej për anëtarësimin e Kosovës në NATO, sot është marrë vendim për ardhjen e trupave shtesë për vitin e ardhshëm.
“Nga viti 2008 deri në 2020, Kosova ka ndjekë një politikë të jashtme si faktor i paqes dhe stabilitetit në Ballkan, duke treguar se nuk është konsumues por eksportues i sigurisë. Një politikë e përzier, si kjo tani e qeverisë Kurti, duke u ndjerë herë në ekstazë të triumfalizmit dhe herë të pafuqishëm, nuk diti ta përdorë ndryshimin gjeopolitik që ndodhi pas luftës në Ukrainë dhe aktit të agresionit të Serbisë ndaj Kosovës me 24 shtator. Pas kësaj date, në vend se të hapen dyert për Kosovën drejt NATO-s, për të vulosur identitetin euroatlantik të shtetësisë sonë, Kosova u shndrrua në një temë të sigurisë dhe shqetësim te komuniteti euroatlantik, ashtu sikurse çdoherë kanë dëshiruar ta shohin Kosovën Serbia dhe armiqtë e saj”, ka shkruar Hoxha.
Ndryshe, kryeministri Albin Kurti tha sot se zbarkimi i 200 trupave britanike në kuadër të KFOR-it, pas sulmit të 24 shtatorit po i kontribuon sigurisë./teve1.info./