Ish-ministri i Punëve të Jashtme të Kosovës, Enver Hoxhaj, ka kritikuar Qeverinë Kurti për mosrezultate në politikën e jashtme.
Hoxhaj ka thënë se në këtë fundvit, në vend që Kurti të kishte rezultate sa i përket anëtarësimin në Këshillin e Evropës dhe anëtarësimin në organizata ndërkombëtare, “sot bëri të ditur se Asociacioni i Arkitektëve të Kosovës i është bashkuar Këshillit të Arkitektëve të Evropës si anëtare vëzhguese”, e që sipas Hoxhajt kjo nuk është meritë e kryeministrit.
Ai ka thënë se Kosova këtë vit e përmbyllë pa asnjë rezultat të vetëm.
“Çoroditja e politikës së jashtme të Kosovës dhe kultura e papërgjegjshmërisë së kësaj qeverie tregon se Kryeministri Kurti në vend se ta kishte si rezultat të fundvitit marrjen e statusit të kandidatit të BE-së, marrjen e Partneritetit për Paqe të NATO-s, anëtarësimin në Këshillin e Evropës dhe anëtarësimin e Kosovës në ndonjë organizatë ndërkombëtare, sot bëri të ditur se Asociacioni i Arkitektëve të Kosovës i është bashkuar Këshillit të Arkitektëve të Evropës si anëtare vëzhguese, që është meritë e vetë arkitektëve dhe jo e politikës së Kosovës! Kjo tregon se Kosova e përmbyllë këtë vit pa asnjë rezultat të vetëm dhe vetëm me lajme për vizitat jashtë vendit që s’kanë qenë asgjë më shumë se vetëm turizëm politik. Çfarë ngadhënjimi qesharak i diplomacisë sot dhe çfarë mjerimi politik”, ka shkruar Hoxhaj./teve1.info/
