Abit Hoxha, profesor në Universitetin Agder në Norvegji, i ka vlerësuar si fasadë politike aksionet e institucioneve të Kosovës për mbylljen e disa strukturave paralele në veri të vendit e që një aksion i tillë është zhvilluar edhe të mërkurën.
Ai ka thënë se veprime të tilla nuk është që nuk janë pritur dhe se kjo është edhe lojë politike në raportet Kosovë – Serbi.
“Këto veprime në një farë forme janë një fasadë politike për mendimin tim dhe natyrisht se do të shkaktojnë njëfarë reagimi, po kjo është vetëm e normalizune në veriun e Kosovës. Nuk është që nuk pritej, nuk është që nuk mund të bëhej. Natyrisht kjo është pjesë e lojës politike në raport me Serbinë ose bashkësinë evropiane apo zhvillimet tjera që kanë të bëjnë me propozimin e ri të z.Lajçak”, ka thënë Hoxha në emisionin “Këndi i Debatit” në Tëvë1.
Në aksionin e zhvilluar të mërkurën në veri të Mitrovicës është mbyllur Administrata Tatimore serbe.
Policia e Kosovës të mërkurën ka kryer bastisje edhe në objektin e kompanisë së sigurimeve “Dunav” e cila dyshohet për keqpërdorim të autorizimeve ekonomike dhe që e njëjta nuk është e pajisur me licencë.
