Ish-drejtori i Inspektoratit Policor të Kosovës, Valdet Hoxha ka thënë se inicimi i procedurave disiplinore ndaj zyrtarit policor në lidhje me rastin e 18-vjeçarit në Podujevë është bërë për shkak të presionit publik.
Ai në emision “Info Nata” në Tëvë 1, tha se në këtë rast nuk ka ndonjë dëmtim të provave, pasi siç kanë deklaruar në raport të IPK-së, të gjitha faktet janë dorëzuar në Prokurori.
“Nëse në rastin që po flasim vet inspektorati ka konfirmuar se ende pa shkuar raporti me ndryshime në Shtabin e Përgjithshëm të Policisë, në Prokurorinë e Shtetit ka shkuar lënda e kompletuar me të gjitha provat e rastit, më të gjitha video-incizimet, më të gjitha provat materiale, pra rasti nuk është dëmtuar dhe hetimi i rastit nuk është dëmtuar atëherë po besojë që inicimi i procedurës disiplinore ndaj zyrtarit në fjalë, po besojë është bërë vetëm nga presioni i publikut, për shkak të interesit të madh të ngjarjes. Është interes i natyrshëm sepse është një ngjarje e dhimbshme dhe shpresoj që të jetë e fundit”, ka thënë ai.
Ndryshe, sot IPK ka njoftuar se ka filluar një hetim preliminar lidhur me rastin e vrasjes së 18-vjeçarit, Lulzim Fejzullahu në Podujevë, pas ngritjes së disa çështjeve të cilat janë paraqitur si shqetësim në opinion (sidomos rreth raportimeve fillestare nga Policia e Kosovës përmes raportit 24 orësh për këtë incident).
Në një komunikatë për media thuhet se IPK ka iniciuar procedurë disiplinore ndaj zyrtarit përgjegjës dhe i njëjti do të procedohet në Drejtorinë përgjegjëse për hetime disiplinore brenda Policisë së Kosovës.
Krahas kësaj, IPK do të iniciojë një inspektim për të analizuar dhe vlerësuar mënyrën e raportimit dhe komunikimit, si dhe hartimin e raporteve të shpejta në të gjitha nivelet brenda Policisë së Kosovës./teve1.info
Raporti policor për vrasjen në Podujevë, IPK inicion procedurë disiplinore ndaj zyrtarit përgjegjës
