Deputetja e Partisë Demokratike të Kosovës, Eliza Hoxha ka deklaruar se akuzat e presidentes, Vjosa Osmani dhe të Lëvizjes Vetëvendosje ndaj gjyqtarit të Gjykatës Kushtetuese, Radomir Laban, nuk mund të mbesin vetëm fjalë goje.
Sipas Hoxhës, nëse ka diçka konkrete dhe të vërtetë, duhet të ndërmerren veprime nga organet e rendit, pasi siç ka theksuar ajo nuk mund të cenohet Gjykata Kushtetuese.
“Nëse ka diçka konkrete dhe të vërtetë besoj që organet e rendit do të duhej të vepronin qysh në fillim nga 2018-ta e tutje ose edhe në 2020-ën nëse kanë gjetur diçka. As nuk po e mbroj profilin e tij se nuk e njoh personin në fjalë, as nuk po e mohoj, por nuk më takon mua ta interpretoj. Meqë prej presidentes e poshtë, do të thotë njerëz të profileve më të larta shtetërore, kanë gjetur ta interpretojnë dhe ta vënë në pikëpyetje kredibilitetin e tij profesional dhe integritetin e tij personal, besoj që kjo nuk mund të mbetet më vetëm një fjalë goje, por do të duhet të ketë dëshmi sepse nuk mund të cenohet institucioni”, ka thënë ajo në emisionin “Info Nata” në Tëvë1.
E pyetur se pse mendon se janë ngritur këto dyshime pikërisht në këtë kohë, Hoxha është shprehur:
“Unë nuk dua të spekuloj, nuk më takon. Kushdo që dëshiron ta përdorë këtë fakt qoftë për një poen politik, qoftë për ta vënë në pikëpyetje kredibilitetin e Gjykatës Kushtetuese apo vendimin e fundit të saj, edhe ta vazhdojë pengun institucional do të duhej të sqarohej kjo çështje sepse këtu pastaj kemi të bëjmë me shumë vendime në të cilat ai ka qenë gjyqtari kryesor..”.
