Ambasadori i Shteteve të Bashkuara të Amerikës Jeff Hovenier, ka uruar Kosovën për përmirësimin në renditjen e Indeksit të Perceptimit të Korrupsionit të Transparency International.
Ai në një deklaratë të cilën e ka publikuar ambasada amerikane në Prishtinë, ka thënë se një nga objektivat strategjike të kësaj ambasade bashkë me Kosovën është luftimi i korrupsionit.
“Një nga objektivat strategjike të Ambasadës së SHBA-së në Prishtinë me Kosovën është luftimi i korrupsionit dhe mbështetja e qeverisjes së mirë. Urime Kosovës për renditjen e përmirësuar në Indeksin e Perceptimit të Korrupsionit të Transparency International për të dytin vit radhazi”, ka thënë Hovenier, shkruan teve1.info
Në raportin e Transparency International për vitin 2002, Kosova ka vazhduar përmirësimin, duke u vlerësuar me 41 pikë. Kosova është ranguar në vendin e 84 në ranglistën botërore prej 180 shtetesh, përcjell teve1.info.
Në bazë të këtij rangimi, krahasuar me vendet e Ballkanit Perëndimor, Kosova renditet në vendin e dytë.
Kryeministri i Kosovës, Albin Kurti, duke komentuar këtë raport, ka thënë se shteti dhe populli ka potencial edhe për më shumë, por që ishte bllokuar nga elitat politike.
“Ky potencial ishte mohuar nga elitat politike të korruptuara që duke e pasuruar veten na e vjedhnin të ardhmen tonë e të fëmijëve tanë. Ne do të vazhdojmë të qeverisim mirë e ndershëm. Do të vazhdojmë të realizojmë pritjet e qytetarëve e të kryejmë detyrat tona. Bashkë do të avancojmë demokracinë, rrisim mirëqenien, përmirësojmë imazhin dhe fuqizojmë Republikën tonë”, ishte shprehur Kurti.
