Ambasadori amerikan në Kosovë, Jeffrey Hovenier, ka uruar Gresa Caka-Nimanin për rizgjedhjen në një mandat të dytë në krye të Gjykatës Kushtetuese.
Ai tha se institucionet e pavarura gjyqësore janë një gur themeli i çdo demokracie
“Urime Gresa Caka – Nimani për rizgjedhjen për një mandat të dytë në krye të Gjykatës Kushtetuese. Institucionet e pavarura gjyqësore janë një gur themeli i çdo demokracie. Ne mbetemi të përkushtuar për të ndihmuar institucionet kosovare që të promovojnë dhe forcojnë sundimin e ligjit”, ka shkruar ai.
Gresa Caka-Nimanin e ka uruar edhe ambasadori gjerman në Kosovë, Jorn Rohde.
Rohde shkroi se ky institucion është ndër “lojtarët më të rëndësishëm” të shtetit të Kosovës.
“Në një demokraci si Kosova, Gjykata Kushtetuese është pjesë përbërëse e strukturës shtetërore dhe një nga lojtarët më të rëndësishëm të saj”, tha ai.
Ndryshe, të mërkurën Gresa Caka-Nimani është rizgjedhur në krye të Gjykatës Kushtetuese të Kosovës edhe për një mandat.
“Në seancën administrative të mbajtur më 5 qershor 2024, në përputhje me Nenin 114, pika 5, të Kushtetutës së Republikës së Kosovës, gjyqtarët e Gjykatës Kushtetuese të Kosovës kanë rizgjedhur kryetaren aktuale të Gjykatës, znj. Gresa Caka – Nimani, për një mandat të dytë në krye të Gjykatës Kushtetuese”, thuhet në njoftim e gjykatës.
Caka-Nimani është dekretuar gjyqtare e Gjykatës Kushtetuese të Republikës së Kosovës, më 30 dhjetor të vitit 2015.
Sipas biografisë së saj të publikuar në faqen e Gjykatës Kushtetuese të Kosovës, deri në emërimin e saj, gjyqtarja Caka-Nimani ka shërbyer si Këshilltare e Lartë Ligjore dhe Udhëheqëse e Ekipit të Zyrës për Demokraci dhe Qeverisje në Agjencinë Amerikane për Zhvillimin Ndërkombëtar (USAID).
